Shayari by Naseem Akhtar

Rangat terii zulfon kii ghaTaaon ne churaaii
Khushbuu tere aa.Nchal se havaaon ne uDaaii

paimaane kaa dil TuuT na jaaye to kahuuN main
hai chiiz Gazab kii jo nigaahon ne pilaaii

qaidii terii zulfon kaa hai aazaad jahaaN se
mujh ko ye rihaaii to sazaaon ne dilaaii

maanaa kii bahaaron ne khilaayaa hai gulon ko
ulfat kii kalii dil men vafaaon ne khilaaii

tham-tham ke barasanaa kabhii jham-jham ke barasanaa
saavan ko adaa ye mere ashkon ne sikhaaii

manzil pe pahunch kar 'nasiim' ehasaas huaa hai
jis raah se pahu.nchaa ye Khataaon ne dikhaaii

Sahayari by Nida Fazli

Teraa hijr meraa nasiib hai teraa Gam hii merii hayaat hai
mujhe terii duurii kaa Gam ho kyon tuu kahin bhi ho mere saath hai

mere vaaste tere naam par koii harf aaye nahin nahin
mujhe Khauf-e-duniyaa nahin magar mere ruu-ba-ruu teri zaat hai

teraa vasl ai meri dilrubaa nahin merii kismat to kyaa huaa
meri mahajabin yahi kam hai kyaa teri hasaraton kaa to saath hai

teraa ishq mujh pe hai maharabaaN mere dil ko haasil hai do jahaaN
merii jaan-e-jaaN isii baat par merii jaan jaaye to kya baat hai

Shayari by Nida Fazli

Safar mein dhuup to hogii jo chal sako to chalo
sabhii hain bhiD mein tum bhii nikal sako to chalo

idhar udhar kai manzil hain chal sako to chalo
bane banaaye hain saaNche jo Dhal sako to chalo

kisii ke vaasate raahein kahaaN badalatii hain
tum apane aap ko Khud hii badal sako to chalo

yahaaN kisii ko koii raastaa nahiin detaa
mujhe giraake agar tum sambhal sako to chalo

yahii hai zindagii kuchh Khvaab chand ummiidein
inhiin khilaunon se tum bhii bahal sako to chalo

har ik safar ko hai mahafuus raaston kii talaash
hifaazaton kii rivaayat badal sako to chalo

kahin nahin koi suuraj, dhuaaN dhuaaN hai fizaa

Khud apne aap se baahar nikal sako to chalo

Shayari by Nisa Fazli

Garaj baras pyaasii dhartii par phir paanii de maulaa
chiDiyon ko daanaa, bachchon ko guDadhaanii de maulaa

do aur do kaa joD hameshaa chaar kahaaN hotaa hai
soch samajhavaalon ko thoDii naadaanii de maulaa

phir roshan kar zahar kaa pyaalaa chamakaa naiisaliiben
jhuuThon kii duniyaa mein sach ko taabaanii de maulaa

[saliibe.n=Christian cross; taabaanii - brightness]

phir muurat se baahar aakar chaaron or bikhar jaa
phir mandir ko koii miiraa diivaanii de maulaa

tere hote koii kisii kii jaan kaa dushman kyon ho
jiinevaalon ko marane kii aasaanii de maulaa

Shayari by Abbas Dana

Apane Khvaabo.n me.n tujhe jis ne bhii dekhaa hogaa
aa.Nkh khulate hii tujhe Dhuu.NDhane nikalaa hogaa

zindagii sirf tere naam se mansuub rahe
jaane kitane hii dimaaGo.n ne ye sochaa hogaa

[mansuub = related]

dost ham us ko hii paiGaam-e-karam samajhenge
terii furqat kaa jo jalataa huaa lamhaa hogaa

[paiGaam-e-kam = message of kindness; fuqat = separation]

daaman-e-ziist me.n ab kuchh bhii nahii.n hai baaqii
maut aa_ii to yaqiinan  use dhokaa hogaa

[daaman-e-ziist = fabric of life; yaqiinan = surely]

raushanii jis se utar aa_ii lahuu me.n mere
ai masiihaa vo meraa zaKhm-e-tamannaa hogaa